te
xewnên min ên bêdûmahî dîl girtin
xewnên ku di xewê de bicih nedibûn
te perçe kirin
di gora şadiyê de
li benda te me
destên xwe bide
di hişyariya sebrê de
derya min perçebû
asîman digirî
di nav paşmayî yên rêhber Nuh de
ez tî ma me
di rastiyê de navnîşana vê nama min jî nîne û navnîşana min jî hê nediyar
van nameyên veşartî û peyvên wan
rû yê gelek kaxizan qermiçandin
di destên min ên sêwî de çîroka hesreta min
a biqasî kefa mistên min bîrovgirtî
ji şopa hesretê pêve li paş xwe tiştek ne hişt
zayîna rist û rêzên payvên van naman
nezayînên hestên bi zimanê xweşik hilokirî ne
xew revîna xewnên min
ji tirsa
di dengê ajelan de û fêrbûne bihîstina dengê firîna çûkan
ji zanîna rawestana
li hêviya vekirina leza kûlîlkên di bayana sibê de
ji hîskirina herika cûdabûnên dûr û rêwîtiyên cihên nenas
ji ne ronîkirina zarokiya qurmiçî
jiyana sar û germ têr û birçîtiyên bihûrî
ji wêrekiya baweriyê û şerma tirsê
ji evîndarî û windakirina evîna te
ji bihistina henasa mirinê û yarîkirina bi jînê
ji fêrbûna heroj bi strên re firînê
ji vekirina pencera heval û hogirên çûyî û pêlên dengên wan dagîrkirina oda dengvemirî
ji tenê mane loriyên xeyalên li ber serê miriyan
ji ziwa nebûna balîfê şehidê rondikên şevên tarî
ji qurifandina kûlîlkên di bê dema mirina xwe de çilmisîn
dizin û tê
dema ev bîranîn
di hiş de vedigerin xwîna jînê û dibin rabûn û rûniştina bizavê
dema dibin navê windakirina min
dema dibin giyanê êş û şadiyan
dema dibin ez û ez dibim bîranînên xwe
di wê demê de
peyva rêza pêşî silavê li hestên min dike
pişt re stran dibe tovreşêna hestên xoşewîstiyê û di riya diçê evînê de rêzana jîrî yê
li alayekî rûmeta min
a di nav piyan de û li aliyê din guleya di devê çeka hêviyê de
bi hejandina dergûşê re hişyarkirina duhuyên min
li aliyekî nîv mana xeyala te di destên min de
ba û bahozên di nava min de
hêviyên min
li dilê xwe pêçayî ji ra radikin û tarûmarbûna wan bi çavên xwe dibînim
di xwe bi xwe de dixeniqim
bizanîna bêrizgariyê
lê dîsa çav li rê ya destekî dilovaniyê me ez
biqasî mirwarîyeke (încî)di binê deryayê de bêtawan im
û biqasî girtiyekî di bin bivirê celatan de serî jê bûyî tawanbar im ez
tawanên min
qesidên mizgîniya pakrewaniya min e
tu kes nikarê bêtawaniya min bêje
bi tawenê li bêjnûbala tawanbaran tê
ez tê me tawanbarkirin di xasîya hezkirinê de
hezkirina min
ne pelweşîniya payîzê ye pelvekirina kûlîlkên biharê ye
di bîra sebrê de bi kûzê kovanan re jan kişandine
di rojên tarî de kenê hezkirina cîhanê ye
tu û birûskên hezkirnê li bingehê hebûnê min ketin
dinyaya min di dilê xwe de bi cih kirî
cihê henasa bahozeke bi tenê ma
û ji cîhana mezin
misteke ji te ma di awirên min de
kûra hesretê di nava min de dijenê lê dîsa dicemidim
min xirabtir dîtibûn
lê biqasî lerza di sayiya vê şevê de ne lerizî bûm
ez bêjim
çiya dê bimeşin tewafa dawa evînê
bi gotinê re xurura min dê bikevê ser çokên xwe
bêdengiya di guhên gamasî de
dê biqîrê
êdî
bila newin lanet kirin
rojên di sibehên şevên bêxew de çûyîn
were
bi xemgîniya xemgîniyên xwe xemgîniya min tarûmar bike
were
bila îske îskên min nebine gora rondikên min
were
da girî di çavên min de xwe ji bîr bike
were
da hesret deriyan veke
were
da reşikên tirsê di awirên biharê de bimirê
bê ku li hêviya nêrîna çavên te bim
bê yî daxwaziya ku tu li çavên min binêrî
min ji te hezkir
çi dibe bila bibe
vaye dibêjim
ez biqasî navê te
mîna çavên xwe
ji te hez dikim...

Kamran Simo Hedilî kî ye
Hedilî, di sibata 1955 de li gundê Hedilê ya bi ser navça Hezexê hate dinyayê. Di zaroktiya xwe de mala xwe bar dikin bajarê Batmanê. Di temenê ciwaniyê de dikevê nav tevgera azadiya Kurdistanê. Ji terefî dewlata tirk ve, du caran tê girtin. Di cunta eskerî ya 12.10. 1980 de bi hevalên xwe re derbasî Rojavayî Kurdistan û Lubnanê dibe. Xabata xwe li Rojavayê Kurdistanê didomîne, li wir jî ji terefî dewlata Surî ve têgirtin.
Di amadekarî û xabata 15 ê tebaxa 1984 an a çekdarî de ji nû ve di nav tevgerkirina gel li Bakurê Kurdistanê cihê xwe digire. Li Rojhilatê Kurdistanê ji terefî dewlata Îranê ve jî tê girtin. Kamran Simo Hedilî, li her çar parçên Kurdistanê, hem di nav xabata tevgerkirina gel de û hem di nav xabata artêşê de cihê xwe digire. Ji 1982 ve dinivîse, pêşî bi tirkî dinivîsî. Piştre bi kurdî dest bi nivîsandinê kir. Bi kurdî kurteçîrok, helbest, destan û lêkolînên wî di rojname, kovar û malperan de hatine weşandin.
Kamran Simo Hedilî, endamê Pena Kurd a navnetewî ye. Vêga di rêvebariya Înstutyiya Kurdî li Stockholm xabata xwe didomîne. Çar pirtûkên wî yên çapbûyî hene: Lorîna pênûsê, helbest, Civata giyanan, kurteçîrok, Ji Enfalê şeveke bêsibe, destan, Min deng kuştin, helbst. Du pirtûkên wî li ber çapêne: Helbest çi ye? lêkolîn li ser danasîna helbestê û Kîjan kulîlk çavên te ne? Helbest (Zarathustra News).